Responsive image 27-05-2022
Responsive image 988 388 100
Responsive image 09:00-14:00
Responsive image Praza Maior, 32005 Ourense

O Concello adquirirá 40 novos autobuses de última xeneración para renovar e reforzar o servizo de transporte urbano

29 de decembro de 2021 - 14:30

A xunta de goberno aprobou o expediente para comprar os vehículos, cun investimento de 14 millóns de euros, que marcará “un antes e un despois na mobilidade da cidade”, asegura o alcalde


Imagen de noticia

O Concello de Ourense adquirirá 40 novos autobuses para renovar e reforzar o servizo de transporte urbano da cidade. A xunta de goberno local aprobou en sesión extraordinaria celebrada este mediodía o expediente para contratar esta subministración, que se realizará en 3 lotes, por procedemento aberto e cun importe global de 13.999.700 euros.

A compra dos novos hehículos, de última xeración, suporá “un antes e un despois na mobilidade da cidade”, avanzou o alcalde de Ourense, Gonzalo Pérez Jácome, quen lembra que a flota actual conta con vehículos de até dúas décadas de antigüidade. O rexedor confía en que a adxudicación do contrato poida estar completada no mes de marzo, de xeito que os vehículos cheguen á cidade en decembro de 2022, logo dun período de 8 meses de fabricación.

A adquisición de novos vehículos inclúe un total de 15 autobuses de 11 metros, que destacan pola súa grande manobrabilidade, 15 microbuses, para uso principalmente nos barrios, e 10 autobuses eléctricos.

Aínda que non era a opción inicial, o goberno municipal decidiu finalmente que 10 das 40 unidades sexan vehículos eléctricos. Toma esta decisión á vista da normativa ditada polo goberno do Estado, coa finalidade de que o Concello poida acceder a fondos europeos para financiar este cuantioso investimento. A normativa está recollida no Real Decreto-lei 24/2021, de 2 de novembro de transposición de directivas da Unión Europea para a promoción de vehículos de transporte limpos e enerxéticamente eficientes.

En consecuencia, a configuración final dos autobuses serán:  

  • 15 Diesel Euro6 de 8 metros, doble porta e piso semibaixo
  • 15 Diesel Euro6 de 11 metros, doble porta e plataforma baixa
  • 10 Eléctricos de 12 metros, doble porta e plataforma baixa

A compra dos vehículos converterá Ourense no concello de Galicia con máis vehículos eléctricos ou limpos no servizo de transporte público.

Oferta de emprego público

Na mesma sesión, a xunta local tamén acordou aprobar a Oferta de Emprego Público correspondente ao exercicio 2021, na que se inclúen un total de 14 prazas de acceso libre:

2 Traballadores Sociais.

5 Operarios.

2 Conserxes.

1 Médico/a da Unidade Asistencial de Drogodependencias.

1 Enxeñeiro/a Técnico/a de Obras Públicas.

2 Técnicos/as de Administración Xeral.

1 Educador/a Social do Centro de Información Municipal da Muller.

Con respecto á reserva de prazas para persoas con discapacidade, a reserva establécese nunha das prazas de conserxe. O proceso selectivo aplicable será, en tódolos casos, o de concurso – oposición.

A oferta de emprego publicarase no Boletín Oficial da Provincia, no Diario Oficial de Galicia e no Boletín Oficial do Estado.

Finalmente, na sesión desta mañá, a xunta local tamén acordou aprobar de forma definitiva a modificación nº 2/2021 da Relación de Postos de Traballo do Consello Municipal de Deportes, relativa á Xefatura do Consello Municipal de Deportes