O goberno municipal introducirá novidades na celebración dos Maios para revitalizar esta festividade ourensá

O goberno municipal introducirá novidades este ano na celebración dos Maios coa finalidade de “revitalizar” esta tradicional festividade local. Asi o anunciou esta mañá o alcalde de Ourense, Gonzalo Pérez Jácome, quen explica que “queremos retomar esta celebración, logo de dous anos sen poder celebrala, e queremos facelo incorporando novidades que lle dean forza a esta festividade”.

O Concello fomentará un ano máis a realización dos maios por parte de particulares e colectivos da cidade, convocando o tradicional concurso, que premia cada ano as mellores creacións que realicen asociacións culturais, colexios, grupos, colectivos veciñais, entidades e calquera persoa que o desexe. Os traballos que realicen serán expostos na rúa, para que o público ourensán poida desfrutar das creacións artísticas.

A principal novidade chegará despois. O xurado elixirá o maio gañador e este será queimado na Praza Maior nun evento popular e festivo que pretende xerar un novo atractivo e fomentar a participación na festa. Gonzalo Jácome explica que “queremos facer unha innovación porque queremos revitalizar a festa. Mantemos a exposición pola mañá e pola tarde faremos este acto festivo. Sería coma as fallas de Valencia pero ao revés. É dicir, en vez de indultar a falla gañadora, o que faremos é que ao maio gañador se lle condenará e o queimaremos na Praza Maior, por suposto, con todas as medidas e protocolos de seguridade necesarias”.

Explica o alcalde que a queima do maio gañador representará “unha festa de purificación, un pouco evocando tamén os nosos pasados celtas”. Será, conclúe o alcalde, un evento que quere “darlle forza” á celebración e potenciar así esta cita do calendario festivo tradicional da cidade de Ourense, ao que quere darlle un novo pulo o rexedor.