Responsive image 28-05-2022
Responsive image 988 388 100
Responsive image 09:00-14:00
Responsive image Praza Maior, 32005 Ourense

O goberno municipal proporalle ao Pleno mobilizar 12 millóns de euros para apoiar a actividade económica na cidade

4 de novembro de 2021 - 14:24

A concelleira de Facenda, Ana Morenza, presentará a aprobación a proposta de modificación orzamentaria 3P/2021, que prevé destinar 10 millóns a axudas a hostalaría e comercio local | Será nun pleno extraordinario que se celebrará o vindeiro mércores


Imagen de noticia

O goberno municipal presentará a aprobación por parte do Pleno do Concello a proposta de modificación orzamentaria 3P/2021, que ten como obxectivo mobilizar un total de 12.875.444,39 euros procedentes do remanente de tesourería para dotar crédito en diferentes partidas. Entre elas, destaca unha achega de 10 millóns de euros para subvencións de fomento da actividade económica local, destinadas a hostalaría e ao comercio, sectores que sufriron especialmente o impacto económico ocasionado pola pandemia da COVID-19. Trátase dunha axuda que previamente fora acordada cos grupos políticos municipais.

A concelleira de Facenda, Ana Morenza, presentará a proposta diante do pleno do Concello nunha sesión extraordinaria que terá lugar o vindeiro mércores, 10 de novembro, no Auditorio. “Con esta contía cumprimos co compromiso acadado con ambos sectores”, explica a responsable de Facenda no Concello de Ourense, que agarda “contar co apoio da oposición para facer efectivas estas axudas tan necesarias: sen ese apoio será materialmente imposible”, di.

A modificación orzamentaria inclúe tamén os convenios coas agrupacións de asociacións veciñais Limiar (15.200€) e Miño (15.200€), a Asociación Xuvenil Amencer pola organización do Campamento Urbano (11.000€), o Liceo (6.000) e a Federación de ANPAs públicas (66.000€). Tamén destina 353.700 euros para o funcionamento da Escola Galiña Azul e unha partida de 1,8 millóns de euros para a expropiación da denominada Finca Acebedo, na Cruz Alta, entre outras partidas.