Praza Maior 1        988 388 100

Atopar
Buscador Concello de Ourense

Cultura

Áreas

O grupo Rosaura, da Aula de Teatro Universitaria de Ourense abrirá o 25 de abril a 24ª Mostra Internacional de Teatro Unviersitario de Ourense, co seu espectáculo “Indo e vindo”, ás 19.00 horas, na rúa do Paseo. Ate o día 11 de maio, Ourense acollerá unha trintena de espectáculos de formacións de Galicia, Castela León, Cataluña, Madrid, Andalucía, Navarra, Murcia, Chile, Portugal, Costa Rica, Nicaragua e México, até rematar coa actuación de Maricastaña no Principal

Consulta o Programa_24Miteu.pdf

Toda a información na web da Miteu

 

Concurso Maios 2019

O Concello de Ourense abre o prazo de inscrición no concurso que premiará as mellores coplas e maios que participen na Festa dos Maios 2019, que se celebrará o domingo, día 5 de maio. As tradicionais coplas e maios convócanse de forma aberta para todas as asociacións culturais, colexios, grupos, colectivos veciñais, entidades e calquera persoa que o desexe, sempre que sexa maior de idade. Poderán inscribirse ate o martes, 30 de abril.

En canto aos maios, haberá as seguintes modalidades: o enxebre, tradicional e figurativo que representa pirámides, conos ou cruceiros (300 euros de premio); o artístico, que recrea, cos elementos tradicionais, escenas cotiás, monumentos ou obras de arte do pobo ou da cidade, personaxes, etc (500 euros); o creativo, que é a representación dos maios enxebres podendo utilizar calquera técnica ou material (200 euros); e o infantil, realizado por nenos e nenas, menores de 18 anos (200 euros).

En canto ás coplas, haberá dúas modalidades, as infantís (200 euros de premio) e as de persoas adultas (200 euros). Valorarase a retranca, a composición, o ritmo e a linguaxe utilizados, así coma o emprego da melodía tradicional e que as estrofas vaian enlazadas.

Consulta as bases e ficha de inscrición Bases_Maios_2019.pdf

 

De Ruada entre amigos

O Auditorio Municipal de Ourense acollerá este venres, día 12 de abril, ás 20.30 horas o concerto “De Ruada entre amigos”, no que a coral ourensá celebrará o centenario do seu nacemento. As persoas interesadas en desfrutar do espectáculo poderán recoller as entradas desde mañá ate o propio venres, de 9 a 14 horas, na recepción do Auditorio. Son gratuítas, cun máximo de 2 localidades por persoa. En caso de que quedaran entradas dispoñibles, poderíanse retirar tamén o propio venres pola tarde no despacho de billetes.

O concerto, organizado polo Concello, a través da Concellería de Cultura e a Coral de Ruada, contará coa participación de agrupacións de música tradicional tan senlleiras como Rebulir, Gomez Mouro, Os Melidaos, Treixadura e Luar na Lubre, que quixeron sumarse a esta celebración, na que colaboran tamén a Deputación de Ourense, o Consello da Cultura Galega, a Consellería de Cultura e Turismo da Xunta de Galicia, a Obra Social “la Caixa”, Anpian, Cabú, Bodegas Arnoya e Estrella Galicia.

Marea rock

O cartel das festas de Ourense 2019 comeza a despexar incógnitas coa confirmación das primeiras bandas: Marea e Siniestro Total, dous dos nomes máis senlleiros do panorama rock, que estarán na nosa cidade o xoves 28 e o venres 29 de xuño respectivamente.

Os navarros, logo de 7 anos de ausencia, volven “coa xira máis grande endexamais contada” para presentar 'El azogue', o seu novo álbum (Adianto: En las encías). O concerto será ás 22:30 horas na Explanada de Expourense, e serán teloneados por Lülu (web oficial). As entradas pódense adquirir en Ticketmaster, en Ataquilla, no teléfono 902 504 500 e nos puntos de venda físicos habituais -en Ourense, na sede de Afundación, na Praza Maior) a un prezo de 18 euros máis gastos de xestión.

O segundo dos concertos confirmados é o dos vigueses Siniestro Total, que celebran 35 anos desde a súa formación “con planeamentos iconoclastas e neodadaístas”, como afirman na súa folla de promoción. Actualmente, a banda está formada por Julián Hernández (voz principal, harmónica, guitarras), único supervivente da formación orixinal, Javier Soto (voz, guitarra e coros), Ángel González (batería e percusións), Jorge Beltrán (saxo e teclado) e Óscar G. Avendaño (baixo e coros).

O seu directo, potente e moi divertido, promete ser “un repaso mordaz sobre o ser humano nos últimos 35 anos”, afirman. A súa actuación será na Praza Maior desde as 0:30 horas, de balde pero con aforo reducido.

Antes de Siniestro Total, ás 22:30, subirán ao mesmo escenario os N.E.O., a nova formación de Alberto Cereijo e Tino Mojón, integrantes de Los Suaves.

Festival de jazz 2019

O Festival de Jazz de Primavera de Ourense chega á súa edición número 23 cunha sensacional escolma de formacións musicais, e con 11 concertos que se desenvolverán desde o día 4 de abril ate o 4 de xuño. Esta mañá tivo lugar no salón de plenos do Concello a presentación do certame, na que participaron o alcalde de Ourense, Jesús Vázquez, e a concelleira de Cultura, Belén Iglesias, xunto con Eduardo Rodríguez, responsable de Café Latino e Marco Vázquez, da Fundación Florencio Álvarez.
Será unha edición con ampla presenza de jazz flamenco, da man de Diego Amador, ou dos tríos formados por Antonio Serrano, Josemi Carmona e Javier Colina, así como por este último acompañado por El Bola e Bandolero: un ano máis actuarán en Ourense recoñecidas figuras do jazz internacional, coma os saxofonistas Benny Golson e Charles McPherson, o trío que forma Dean Brown con Dennins Chambers e Hadrien Feraud, ou pianista Benny Green, unha figura emerxente como é a pianista e vocalista Sarah McKenzie, e músicos galegos da talla de Pablo Castaño, Víctor Prieto e Abe Rábade. Todos eles actuarán no Café Latino e as entradas se poderán adquirir desta tarde no propio local.
O certame terá unha das súas citas estelares o venres 3 de maio, cun concerto ao aire libre que ofrecerán The Blues Giants na praza de Santa Eufemia. Unha formación integrada por un elenco de estrelas dentro do mundo do blues; Jimi Bott, Willie Campbell, Sugaray Rayford, Albert Castiglia e Nick Schnebelen, que de seguro fará as delicias dos aficionados a este estilo e amantes da música en xeral.

Consulta o programa completo PROGRAMA_FESTIVAL_JAZZ_2019.pdf
O alcalde de Ourense, Jesús Vázquez, salientou a importancia do Festival de jazz de Primavera de Ourense: “unha cita ineludible do panorama musical español” que -dixo- “lle achega á cidade un valor engadido. É evidente que temos un festival de jazz que para si quixeran en moitas cidades. E o que é máis importante: temos un certame consolidado e sólido que cada ano enche de talento a nosa cidade e proxecta a Ourense cara ao exterior”, subliñou.
Neste senso, manifestou: “Ourense ten un potencial cultural inmenso que debemos apoiar de xeito firme e decidido. Facémolo aunando a iniciativa privada, xerme deste festival, coa colaboración institucional, e así apostamos pola música como motor cultural, turístico... en definitiva, a música como motor económico”, asegurou Jesús Vázquez, quen felicitou o excelente traballo da organización deste festival por parte de Café Latino e Fundación Florencio Álvarez, xunto co Concello.

Musica no Camiño

A Concellería de Cultura presenta, para as vindeiras tres fines de semana, o ciclo Música do Camiño, “unha actividade que quere dinamizar a vida cultural e social da nosa cidade”, en palabras do alcalde de Ourense, Jesús Vázquez, “que pretende unir o noso patrimonio físico e monumental coas músicas que chegan á cidade grazas á nosa incomparable posición dentro das rutas a Santiago de Compostela”, dixo.

“O Concello de Ourense ten a obriga de promover unha oferta variada no musical, e de calidade”, adiantaba Anxo F. Saborido, técnico de Cultura, na rolda de prensa. “Unha oferta que non é de masas, por iso se celebra nun lugar axeitado como é a Igrexa de Santa Eufemia”, matizaba. O primeiro concerto, este venres 29 de marzo, será 'Stabat Mater', a cargo do trío Orsini, Alicerce e Dapena, con música de Haydn ou Boccherini. O venres 5 de abril será a quenda do 'Senhora del Mundo', música relixiosa e profana do Renacemento a cargo de Camerata Piú Bassa. O último concerto será o sábado 13 de abril, 'Salve Regina', a mans de The New Barroque Times, un conxunto que explora e reinventa o universo sonoro dos séculos XVII e XVIII empregando instrumentos e prácticas da época.

O rexedor quixo agradecer o esforzo da Concellería de Cultura por manter viva “esa chama que fai de Ourense unha cidade viva e dinámica”, dixo, “unha cidade cun extraordinario patrimonio, continuamente alimentado pola influencia de visitantes a través da Vía da Prata – Camiño Mozárabe”. Cómpre salientar que Música do camiño se une a outras propostas de calidade contrastada coma o Enclave de Cámara, que por certo volve o 4 de abril co Trío Arriaga, o xa mencionado Pórtico do Paraíso ou o Ciclo Lírico.

Concertos:

Venres 29 de marzo: 'Stabat Mater'

Orsini, Alicerce e Dapena, 20:30 horas. Igrexa de Santa Eufemia.

Venres 5 de abril: 'Senhora del Mundo'

Camerata Piú Bassa, 20:30 horas. Igrexa de Santa Eufemia.

Sábado 13 de abril: 'Salve Regina'

The New Barroque Times, 20:30 horas. Igrexa de Santa Eufemia.

Consulta o Diptico_Festival_Musica_do_Camino.pdf

Teatro Mariana

O espectáculo de danza Entresoños, da compañía de Fran Sieira, iniciará pasado mañá, xoves, unha fin de semana cargada de cultura no Auditorio municipal, que inclúe a estrea de Mariana, de Palmyra Teatro, no marco das actividades co gallo do Día Internacional das Mulleres, e unha nova cita co teatro infantil con E-book: As idades do libro.

Homenaxe a Benito Losada

O Concello de Ourense rendeulle esta mañá homenaxe a Benito Losada, fillo adoptivo da cidade, nun acto institucional no salón de plenos en presenza da Corporación municipal, familiares e amizades do que fora director da Casa da Xuventude e axente dinamizador cultural da cidade. O alcalde de Ourense, Jesús Vázquez, entregoulle ao fillo, Anxo López o pergamiño co que o Concello recoñece a achega dun home “que quixo e soubo ser axente comprometido, vocacional e dinamizador da cultura na nosa cidade. Que ao longo dunha longa, constante e diversa traxectoria impulsou proxectos, alentou iniciativas e animou a moitos ourensáns e a moitas ourensás, principalmente xente nova, a crer na cultura e na expresión artística, e a apostar polo asociacionsimo, a atopar neles un modo de vida e unha forma de desenvolvemento artístico ou persoal, mais ao tempo tamén unha forma de enriquecer social, cultural e sentimental á nosa cidade”, asegurou o alcalde.

Tertulias literarias

Medio milleiro de escolares e docentes participarán este ano no programa “Tertulias literarias”, que organiza o Concello de Ourense coa colaboración da Deputación de Ourense.

Auditorio_2019

Pablo Milanés, Bustamante, Antonio Orozco ou Coti son algúns dos nomes que pasarán, durante o primeiro semestre do ano, polo Auditorio de Ourense.