Praza Maior 1        988 388 100

Atopar
Buscador Concello de Ourense

Urbanismo, Licenzas e Vivenda

Áreas

O Concello de Ourense vén de realizar un importante avance nas políticas municipais de posta en valor dos barrios da cidade nas catro áreas de rehabilitación e reforma urbana (ARRU); O concelleiro de Urbanismo, José Cudeiro, resolveu esta mañá o programa de subvencións para un total de 96 proxectos. Estas obras suporán un investimento total de 1.022.366,28 euros, dos que 433.219,42 euros serán subvencionados polo Ministerio de Fomento e a Xunta de Galicia a través deste programa que desenvolve o Servizo de Rehabilitación do Concello.

“Froito do traballo da do Servizo de Rehabilitación, aprobamos a resolución das convocatorias de subvencións realizada polo Concello para darlle apoio aos proxectos de rehabilitación de vivendas que se desenvolverán nas 4 áreas de rehabilitación da cidade, as tecnicamente coñecidas como ARRUS: o centro histórico, o núcleo etnográfico de Seixalbo, a área O Polvorín-As Camelias- A Carballeira e a integrada por Serra Mamede, Cruceiro Quebrado e A Inmaculada”, valoraba o alcalde de Ourense, Jesús Vázquez.

“No mes de abril lanzamos unha convocatoria para que as persoas interesadas en executar obras de rehabilitación de vivendas e edificios nestas áreas tivesen a oportunidade de acceder ás axudas”, dixo Vázquez Abad. “Unha vez avaliadas tecnicamente as solicitudes, hoxe aprobamos a resolución na que se recoñece o dereito a percibir as subvencións polos proxectos de rehabilitación destas 96 vivendas, e remítense ao Instituto Galego de Vivenda e Solo para a súa cualificación e, se procede, ao outorgamento da subvención”.

Este programa, para a realización de obras de mellora no interior das vivendas e en elementos comúns de edificios, seguirá ao longo dos próximos anos grazas ao novo Plan Estatal de Vivenda 2018-2021, cuxo desenvolvemento foi aprobado vai hoxe unha semana polo Consello de Ministros.

Centro histórico. Concédense axudas para a rehabilitación de 19 vivendas, que suporán un investimento de 184.391,36 euros. Nesta convocatoria, a número 15 xa deste programa, as subvencións ascenderán a 67.917,51 euros.

Na zona vella falamos dunha resolución parcial, xa que aínda que hai solicitudes presentadas, non todas presentaron toda a documentación necesaria, polo que haberá proximamente outra resolución, para outras 11 vivendas, que suporán un investimento de 37.763,80 euros.

No núcleo etnográfico de Seixalbo, onde xa estamos na décima fase do programa de rexeneración e renovación urbana, recoñécense o dereito a ser seleccionados 5 proxectos de rehabilitación de vivendas, cun investimento total de 163.443,77 euros. As axudas ascenderán a 37.351,74 euros.

Na ARRU O Polvorín, As Camelias, A Carballeira (que se atopa na 4º fase), recoñécese o dereito a ser seleccionados os proxectos de rehabilitación de 73 vivendas. Suporán un investimento total de 584.096,23 euros, dos que as subvencións achegarán 237.515,25 euros.

Nesta área, o número de solicitudes supera o máximo de vivendas incluídas na convocatoria. Por este motivo creamos unha lista de agarda. A ela acudirase se algunha das seleccionadas non acadara a cualificación provisional por parte da Xunta ou se asinase unha addenda ao convenio que aumentara o número de vivendas. As solicitudes en lista de agarda teñen un orzamento total de 157.286,13 euros.

Finalmente, en Serra Mamede, Cruceiro Quebrado e A Inmaculada (na súa segunda fase) selecciónanse proxectos de rehabilitación de 9 vivendas, cun investimento previsto de 90.434,92 euros, dos que as subvencións achegarán 39.979,46 euros.

Neste caso, o número de vivendas concedidas para esta fase eran 20, só se resolven 9, polo que as 11 restantes quedan desertas por falta de solicitudes.